O DÍA DA ILUSTRACIÓN!!!

 O 30 de xaneiro celebramos o Día da Ilustración, unha data moi especial para poñer en valor a importancia das imaxes como forma de expresión, comunicación e creatividade, coincidindo coa lembranza de Alfonso Daniel Rodríguez Castelao, figura da nosa ilustración e cultura.

Desde a trasnoteca quixemos destacar o papel fundamental da ilustración nos libros, especialmente na infancia. As ilustracións non só acompañan os textos: axudan a comprender mellor as historias, estimulan a imaxinación e fan que a lectura sexa máis atractiva para os nenos e nenas.

Ao longo do día, o alumnado achegouse a diferentes libros ilustrados, descubrindo estilos variados e comprobando como unha imaxe pode contar tanto como unha historia escrita. Foi unha boa oportunidade para mirar con atención, pensar e deixar voar a creatividade.

A ilustración é tamén moi importante no desenvolvemento dos nenos e nenas, xa que lles permite expresarse, entender mellor o mundo que os rodea e gozar da lectura desde pequenos. As imaxes axúdalles a soñar, aprender e sentir emocións.

Desde a trasnoteca agradecemos a participación de toda a comunidade educativa e animamos a seguir descubrindo libros cheos de ilustracións, porque a través delas tamén se aprende e se crece.

POSTAIS CON MAXIA

 Dende Biblioteca queremos darvos a s grazas a todas e todos pola vosa participación no Concurso de Postais de Nadal deste ano. Recibimos moitas propostas cheas de creatividade, ilusión e fixo especialmente difícil a elección.

Cada postal amosou talento, esforzo e ganas de compartir a maxia destas datas tan especiais.

Estamos moi orgullosos da participación e do nivel demostrado.

Os gañadores deste ano 2025/26 son:

INFANTIL- Hugo Costa de 6º Infantil.

PRIMER CICLO- Vania Conde de 1º A

SEGUNDO CICLO- India Prieto de 4ºA

TERCER CICLO- Alba Romero de 6º C

Desde aquí queremos desexarvos un moi Bo Nadal e unhas felices festas.

Felices Lecturas a todos.

EMPEZA A CHEIRAR A NADAL!!!

A maxia do nadal xa se sente polo cole, e a trasnoteca non se podía quedar atrás. Esta semana, durante os recreos, comezamos cos obradoiros de decoracións de Nadal  que cada curso se preparan con tanta ilusión e imaxinación.

O alumnado de 5º de Primaria foi o primeiro en inaugurar esta tradición, realizando xa o seu obradoiro de decoracións.

A vindeira semana continuaremos cos demais cursos:

• 4º de Primaria → Martes 9

• 3º de Primaria → Mércores 10

• 2º de Primaria → Xoves 11

• 1º de Primaria → Venres 12

Ademais, na parede exterior da biblioteca xa están expostas as postais de Nadal realizadas por todos os cursos, cheas de cor, bos desexos e moita imaxinación. Animamos a todas as familias e ao alumnado a pasar e desfrutar desta fermosa mostra colectiva!

Así que xa sabedes, esperámosvos aquí! 

Que comece o Nadal!!!

ABRE CON NOS A PORTA VIOLETA!!!

Onte, con motivo do 25N – Día Internacional para a Eliminación da Violencia contra a Muller, a nosa biblioteca encheuse de voz, emoción e compromiso.

O alumnado de sexto de Primaria preparou unha actividade moi especial na que a literatura e a música foron protagonistas.

Ao longo da mañá, os nenos e nenas interpretaron poemas dedicados á igualdade, ao respecto e á convivencia. Cada lectura foi unha invitación a reflexionar sobre a importancia de construír un mundo máis xusto e seguro para todas as persoas.

Para poñer o broche final, os grupos de sexto ofreceron unha fermosa interpretación de “A porta violeta”, de Rozalén. Cantárona con moita sensibilidade e, ademais, acompañaron a melodía tocando o ukelele. O resultado foi un momento máxico que emocionou a todas as persoas presentes.

Desde a trasnoteca queremos agradecer a súa implicación e lembrar que a cultura, xa sexa a través dos libros, da poesía ou da música, é unha ferramenta poderosa para educar en valores.

Grazas por abrir connosco esta porta violeta cara á igualdade!

NOVIDADES DE LECTURA NA TRASNOTECA

Moi bos dias rapaces e rapazas, temos novidades de lectura!!!

Na Trasnoteca sempre nos encanta incorporar novas historias ás nosas estanterías, e este mes temos unha selección moi especial para os lectores máis pequenos. Aventuras, misterio, humor e moita imaxinación… ¡todo listo para que os nenos e nenas atopen o seu novo libro favorito!

 

O que internet non conta!!!

Hoxe vivimos unha xornada moi especial na nosa biblioteca escolar. Recibimos a visita de Roberto Valente, garda civil especializado en educación para a cidadanía dixital, que veu compartir cos máis pequenos unha charla chea de consellos útiles e exemplos prácticos para navegar con seguridade polas redes.

A sesión estivo chea de contidos educativos, preguntas e moita curiosidade por parte do alumnado. Roberto explicou dun xeito sinxelo, próximo os principais perigos das redes sociais, como a difusión de información persoal, o contacto con descoñecidos ou a importancia de pensar antes de publicar.

Un dos temas que máis chamou a atención foi o da huella dixital: todos eses rastros que deixamos cando usamos internet e que, sen darnos conta, poden permanecer durante moito tempo. Os nenos e nenas aprenderon que cada fotografía, comentario ou “gústame” constrúe unha parte da súa identidade en liña.

Tamén falamos sobre os dispositivos intelixentes, como móbiles, altavoces virtuais ou tablets. Roberto explicou que, “escoitan nin ven todo o que facemos” ,  ademáis de que poden recoller datos se teñen certas funcións activadas. Por iso, é importante configurar adecuadamente a privacidade, revisar os permisos das aplicacións e pedir sempre axuda ás persoas adultas.

Outro punto fundamental da charla foi o risco de que, nalgúns videoxogos en liña, como Roblox, persoas descoñecidas intenten facerse amigas de menores para gañar a súa confianza e logo propoñer encontros na vida real. Roberto insistiu en que isto non é seguro nin aceptable, e que calquera situación deste tipo debe ser comunicada inmediatamente ás familias ou ao profesorado. O alumnado aprendeu que, igual que na vida cotiá, non se debe quedar con ninguén que non se coñeza e que os videoxogos deben ser un espazo de xogo, nunca un lugar para dar información persoal.

Foi, sen dúbida, unha actividade enriquecedora que axuda a formar usuarios responsables e críticos no mundo dixital.

Desde a biblioteca queremos agradecerlle a Roberto Valente a súa achega e o seu tempo. Agardamos volver a velo noutra ocasión para seguir aprendendo sobre este tema tan importante!

UNHA MAÑÁ DE MEDO!!!

Esta semana na Trasnoteca vivimos unha xornada moi especial! Celebramos o Samaín/Halloween cunha mañá chea de música, contos e moita maxia. A biblioteca encheuse de risas, disfraces e espíritos festivos que fixeron que todos, pequenos e maiores, gozasen dunha mañá inesquecible.

Comezamos coa actuación dos profes, que nos fixeron pasar un intre moi divertido. Susana, Natalia, Sergio, Antonio, Bea, Ana e Sara subiron ao escenario co seu mellor espírito de Samaín e sorprenderon a todos cun espectáculo terrorífico cheo de humor, ritmo e moita enerxía. Non faltaron as risas nin os aplausos.

Despois chegou o turno dos verdadeiros protagonistas da xornada: os nenos e nenas de sexto. Prepararan con moita ilusión unhas actuacións coas cancións de “Happy Halloween”, que fixeron cantar e bailar a todo o público. Foi xenial ver o traballo, a creatividade e o entusiasmo que puxeron en cada detalle.

A continuación, chegou un dos momentos máis esperados: a actuación da familia Addams. Co seu coñecido espectáculo de mans e vasos, fixeron unha posta en escena impresionante que deixou a todos coa boca aberta. Ritmo, coordinación e moito talento… parecía que tiñamos á verdadeira familia Addams na Trasnoteca.

E para poñer o broche de ouro a esta xornada tan especial, e, en honra do día da biblioteca escolar, recibimos a visita dunha contacontos moi especial, Uxía Morán que nos mergullou nun mundo de historias misteriosas e cheas de fantasía. Os contos de temática de Halloween/Samaín fixeron voar a imaxinación de grandes e pequenos, e deixáronnos coa sensación de que a maxia do Samaín segue viva na nosa biblioteca.

En resumo, foi unha mañá chea de emocións, creatividade e espírito de Samaín. Desde a TrasnoTeca, queremos dar as grazas a todo o profesorado, ao alumnado e á nosa contacontos convidada por facer deste día unha auténtica festa das letras e da imaxinación.

Ata o vindeiro Samaín… e lembrade que os libros tamén gardan maxia!